Matthew 25

Ambo 5-pela nomane paika ambo 5-pela nomane napai

1God dumoye wopake kantau yendo ge embe mal yendo. Iwa ta ana kindja i pagle, wono dje yei. Ambo 10-pela wamo lambo i kondwe wonda al kane imbon dje po tau moi. 2Ambo 5-pela nomane paika, ambo 5-pela nomane napaika yei. 3Ambo nomane napai ge lambo nu kolo i napi ba, 4ambo nomane pai ge nu kolo, nume al woro, lambo boll aike i pi. 5Ana inda iwa ge kanan yei, nawoi. Ambo porapora moi ge, ou woika pai.

6Pamaka imina pakna pika una yau to embe dji, iwa ana inda iwa ge wodiwa! Ye er wome! dji. 7Ambo porapora agle yenekne lambo gapon dje yemaka, 8ambo nomane napai ge embe dji, no lambo nu namoro, ye nu kolo iwi ge no ta aume! dji. 9Ambo nomane pai ge embe dji, man, ye no boll aike gapon ge, nu kune namoro. Ye po nu gun top to ime! dji. 10Djimaka kambono nu top tambon dje pille er pumaka, iwa ana inda iwa ge er woi. Ambo wal amblokun ye moi ge, une boll kwa kerman nambon dje pille er numog pumaka, kond tugi. 11Tugo kermaka ambo kambono ge are wo embe dji, Iwa Kerman, Iwa Kerman, no kond yapro awe! dji. 12Ba Iwa Kerman embe dji, na kandja kaima dje ye aundo, na ye nakanill una mor we dji.

13Jisas embe dji, ambo yei mal ge, ye kanpol tane! Ye Iwa Kerman wonda kune, ye nakaninj we dji.

Iwa Kerman boiye una kogone ye ku i mal Jisas kandja buko dji

(Luk 19.11-27)

14Jisas embe dji, God dumoye kantau yendo ge embe yendo. Iwa ta er dumo ellke puno dje pille, yene boiye una dji womaka iwa ge embe dji, na wal kane noll ge ye bisnis ye kane molme! dji. 15Une po boiye una ku taimantaiman dje ga kanpol tane mal pille awi. Ta ku paip tausen (5,000) awo, ta ku tu tausen (2,000) awo, ta wan tausen (1,000) awo embe yei. Awo kere er dumo ellke pi. 16Iwa ku paip tausen i iwa ge, une ola dje po kogoye ye molo ku paip tausen (5,000) i be wori. 17Yei mal embe, ku tu tausen i iwa ge, po kogoye ye molo, ku tu tausen (2,000) i be wori. 18Ba alla, ku wan tausen i iwa ge, une po iwa kerman kuye ipo tupa wallke seke pagi.

19Ku ne, kanan wane er woi. Ku awi mal pille, na boina kambono po kogo namba mal yei ne? dje pi. 20Une boiye una dji womaka, ku paip tausen awi una embe dji, Iwa Kerman, ni ku paip tausen awin ge na kogoye ye po, ku paip tausen i be worill yero we dji.

21Iwa Kerman embe dji, ni boi wopake mon, na kandja djill mal ni pille yen. Na wal merke nawill ba, ni kane wopake yen. Na ye wornaka ni wal merke kantau yemben. Ni wo na boll wo pupen we dji. 22Djika ku tu tausen i iwa wo embe dji, Iwa Kerman, ni ku tu tausen awin ge na kogoye ye molo, ku tu tausen i be worill yero we dji. 23Iwa Kerman embe dji, ni boi wopake mon, na kandja djill mal ni pille yen. Na wal merke nawill ba, ni kane wopake yen. Na ye wornaka ni wal merke kantau yemben. Ni wo na boll wo pupen we dji. 24Una ku wan tausen i iwa wo embe dji, Iwa Kerman, na kanill, ni una dongall mon. Wal nayan ge wallke nonden, wal napagin ge ni po i nonden. 25Ni embe yenden ge na ni pille kand goll. Ni ku awin ge na ipo tupa wallke seke pagill. Nenem kuin awin mal pene yero ge we dji. 26Djika Iwa Kerman embe dji, ni boi ke mon, ni kogo nayen paro. Na wal napagill ge po i nondo, wal nayall ge wallke nondo mal ni kanden ba, 27na kuna ipo beng al worbenka wombe kuya ba namba yei pille ipo nawornin ne? dji. 28Iwa Kerman embe dji, iwa ku wan tausen ye moro ge, ye ipo una ku ten tausen ye moro ge aune! 29Una ta wal ye moya ge na wal ta aunaka une wal merke ye moya ba, una ta wal ta nayei dal, kembis ta ye moya ge i yem djino. 30Boi ke moro ge ye i orkoto emill yendo al worneke, una kasmane koglo, kimb kallgane ye mor al ge moya we dji.

Jisas una porapora kot ye aunda

31Are Una Wombe yembe dongall pandaka, yene tau agelo kambono boll yem wo sia king al ami dje moya. 32Une kandja djindaka, una kuruwo kama porapora wo pakna moyeke, okum to i epil soka worda. Kog sipsip kantau yenj una sipsip i djell woro, meme i djell woro yenj mal Una Wombe embe yenda. 33Sipsip i une agle woto woro, meme i agle darto woro embe yenda. 34Embe ye pagle, King kandja embe djinda, na Nena wopake pille awi una ye mor ge er wome! djinda. Kupill makimb kindja beki kune, yene dumoye wopake yei al ye wo moye dje pille ye wori yero. 35Na koll toika ye na kwa awi. Na numbkana asip toika ye nu kolo awi. Na una gulke woll, ye na i numog wori. 36Na konkunom nayei ba, ye na awi. Na ke toi pallka ye na kantau yei. Na kaye numb pallka, ye wo na kani.

37Embe djindaka, singare wopake yei una kandja dje yem woro embe djine, Iwa Kerman, kune nam kanpin ni koll toi, numbkan asip toi, no ni kwa ne, nu aupin ne? djine. 38Kune nam kanpin ni una gulke won, no ni i numog worpin? Kune nam kanpin, ni konkunom nayei, alla no ni aupin? 39Kune nam kanpin, ni ke toi mo, kaye pan no ni kantau yepin?

40Embe djine ba King ge embe djinda, na kandja kaima dje ye aundo. Ye na agana kambono kandjine napai una ye wopake ye awi ge, ye na ye wopake ye awi we djinda.

41Dje kere pagle, ga yene agle darto moi al ge, une embe djinda, God ye tonda una ye mor ge, ye na kere, er wamo do paro al po molme! djinda. Wamo paro ge God Satan yene kum epiliye boll po moye dje wori yero. 42Ge na koll toi, ye na kwa nawi. Na numbkana asip toi, ye nu kolo na nawi. 43Na una gulke woll, ye na i numog nawori. Na konkunom nayei, ye na nawi. Na ke toi, kaye pall, ba ye wo na nakani.

44Une kandja embe djindaka, kambono pille kandja dje yem woro embe djine, Iwa Kerman, kune nam kanpin ni koll toi, numbkan asip toi, una gulke won, konkunom nayei, ke toi, kaye pan no ni amblo pille dje naupin ne? djine.

45King ge embe djinda, na kandja kaima dje ye aundo, na agana kandjine napai una ye wopake ye nawi ge, ye na ye wopake ye nawi we djinda. 46Embe pille, ye epil ge wamo do paro al po ngembill ege ege goye. Ba singare du dje yenj una ge gun molo pane we dji.